Fotograf Maýlz Astreý 1839 Color Photography Awards bäsleşiginde neýroulgamlar tarapyndan döredilen suratlar boýunça kategoriýa hakyky fotosuraty ugradandygy üçin bäsleşikden çykaryldy diýip, Hi-tech Mail.ru habar berýär.
Astreý bäsleşige kellesini ganatynyň astynda gizlän flamingonyň suratyny iberipdir. Görlüp oturylsa, bu hakyky surat eken.
1839 Color Photography Awards bäsleşigi “Haýwanlar”, “Natýurmort”, “Peýzaž”, “Binagärlik” we ş.m. kategoriýalary öz içine alýan dürli nominasiýalardan ybarat. Şeýle-de bolsa, Maýlz Astreý töwekgelçilik edip, AI-suratlar kategoriýasynda öz suratyna nähili baha beriljekdigini bilmek isläpdir.
Bäsleşigiň Nýu-Ýork Taýms-yň, Getty Images-iň we Phaidon Press-iň wekillerinden ybarat eminleri galplygy anyklap bilmediler we surat 3-nji ýeri, şeýle hem “Halkyň saýlany” baýragyny aldy.
Aldawyň üsti açylandan soň, bäsleşigiň guramaçylary Astreýi baýrakdan we orundan mahrum etdiler, oňa suratynyň “güýçli çykandygyna” ýokary baha berýändiklerine garamazdan, ýaryşyň şertlerini bozup bolmajakdygyny düşündirdiler.
Astreýiň özi “tebigatyň entegem enjamy ýeňip biljekdigini” we janly suratçynyň henizem gymmatlydygyny görkezmek isländigini boýun aldy. Ol AI tarapyndan döredilen suratlaryň ýaryşlarda agdyklyk edip başlandygyna gaharlanyp, AI-suratlar bäsleşigine hakyky surat ibermek bilen “taryhy üýtgetmek” kararyna gelipdir.
Surat ýaryşyň web sahypasyndan aýryldy we baýrak başga bir gatnaşyja geçdi.
