Kuala-Lumpurda (Malaýziýa) Aziýanyň Futbol Konfederasiýasynyň öýünde ýetginjekler we ýaşlar ýygyndylarynyň arasynda futbol boýunça Aziýanyň Kubogy – 2025-iň saýlama ýaryşynyň bije çekişligi boldy.
Türkmenistanyň ýaşlar ýygyndysy (U20) Ýaponiýa, Gyrgyzystan we Mýanma bilen bilelikde “I” toparça girdi. Ýaryş 25 – 29-njy sentýabrda Bişkekde (Gyrgyzystan Respublikasynyň paýtagty) geçiriler.
Türkmen futbolçylary saýlama ýaryşyna 25-nji sentýabrda Ýaponiýa garşy oýun bilen başlarlar. Olar 27-nji sentýabrda Gyrgyzystan bilen oýnarlar, saýlama ýaryşyndaky çykyşy 29-njy sentýabrda Mýanma garşy oýun bilen tamamlarlar.
Türkmenistanyň ýetginjekler ýygyndysy (U17), öz gezeginde, “D” toparça düşdi, bu ýerde ol Tailandyň, Hindistanyň we Bruneýiň toparlary bilen bäsleşer. Toparlaýyn tapgyryň oýunlary 23 – 27-nji oktýabrda Tailandda geçiriler.
Ýygyndy Aziýanyň Kubogyna tarap ýoluny 23-nji oktýabrda Tailand bilen duşuşykdan başlar. 25-nji oktýabrda Hindistan bilen oýnar, saýlama ýaryşyny 27-nji oktýabrda Bruneýe garşy oýun bilen tamamlar.
Aziýanyň Kubogynyň (U20 we U17) final bölegine toparçalaryň ýeňijileri we ikinji orunlary eýelänleriň arasynda iň gowy bäş topar çykar.
Ýaşlaryň arasynda Aziýanyň Kubogynyň final tapgyryny Hytaý (2025-nji ýylyň 6 – 23-nji fewraly), ýetginjekler Kubogynyň final tapgyryny bolsa Saud Arabystany (2025-nji ýylyň 3 – 20-nji apreli) kabul eder.
Ýetginjekleriň arasynda Aziýanyň Kubogynyň (U17) final tapgyrynyň ýeňijileri 2025-nji ýylda Katarda geçiriljek 20-nji ýetginjekler dünýä Kubogynda Aziýa wekilçilik etmek hukugyny alarlar.
Bellenilişi ýaly, 2025-nji ýyldan 17 ýaşa çenli ýetginjekleriň arasynda dünýä çempionatynyň formaty üýtgär. Ýaryş 48 ýygyndynyň gatnaşmagynda her ýyl geçiriler. 2025-nji ýyldan 2029-njy ýyl aralygynda ýetginjekleriň arasynda dünýä birinjiliginiň indiki bäş ýaryşyny Katar kabul eder.