Fransiýanyň «RMC» web-sahypasy penşenbe güni «Uefa Euro 2024» futbol ýaryşy başlamazdan ozal nemes stadionlarynyň birnäçesiniň atlarynyň üýtgedilendigini habar berdi. Bu stadionlarda şu gün, 14-nji iýunda badalga beriljek futbol boýunça Ýewropa çempionaty geçiriler. Stadionyň adynyň üýtgedilmegi UEFA üçin adaty ýagdaýdyr. Gurama ýaryşlary geçiren wagty howandarlyk atlaryny aýryp, oňa derek bitarap atlary dakýar.
Çempionatyň esasy oýunlarynyň geçiriljek ýeri bolan on stadionyň sekiz sanysynyň ady üýtgeşmä sezewar boldy. Diňe iki sany stadion öňki atlaryny saklap galdylar. Germaniýa bilen Şotlandiýanyň arasynda geçiriljek Ýewropa çempionatynyň açylyş oýny «Allianz Arena»-nyň ady mundan beýläk «Mýunhen futbol stadiony» («Mýünhen Fussbal Arena») diýlip üýtgedildi.
Ýewropa Futbol Assosiasiýasynyň (UEFA) talaplaryna laýyklykda, Ýewropa çempionatynyň gyzykly oýunlaryny teleýaýlymlar arkaly tomaşaçylara ýetirjek resmi ýaýlym guramalary hem stadionlarynyň tassyklanan täze atlaryny tutmaga borçludyrlar.
Ýewropa çempionatynyň oýunlary geçiriljek stadionlaryň öňki we täze atlary:
- Signal Iduna Park, Dortmund şäheri, «Borussiýa» futbol toparynyň meýdançasy, çempionat döwründe — BVB Stadion Dortmund («BWB Ştadion Dortmund») diýlip atlandyrylar.
- RheinEnergieSTADION («Reýn-Energi-Ştadion»), Köln şäheri, «Köln» futbol toparynyň stadiony — çempionat döwründe Köln Stadion («Köln Ştadion») diýlip atlandyrylar.
- Merkur Spiel-Arena («Merkur-Şpil Arena »), Düsseldorf şäheri, «Fortuna» futbol toparynyň meýdançasy, çempionat döwründe — Düsseldorf Arena diýlip atlandyrylar.
- Veltins-Arena («Feltins-Arena»), Gelzenkirhen şäheri, «Şalke 04» futbol toparynyň meýdançasy — çempionat döwründe Arena AufSchalke («Arena AufŞalke») diýlip atlandyrylar.
- Red Bull Arena, Leýpsig şäheri, RB Leipzig futbol klubynyň meýdançasy — çempionat döwründe «Leýpsig Stadion» (Leýpsig Ştadion) diýlip atlandyrylar.
- Allianz Arena («Alýans Arena»), Mýünhen şäheri, «Bawariýa» futbol toparynyň meýdnçasy — çempionat döwründe «München Fußball Arena» («Mýünhen Fussbal Arena») diýlip atlandyrylar.
- Deutsche Bank Park («Doýçe Bank Park), Maýn boýundaky Frankfurt şäheri, «Aýntraht» futbol klubynyň meýdançasy — çempionat döwründe «Frankfurt Arena» diýlip atlandyrylar.
- MHPArena («МHP-Arena»), Ştutgart şäheri, «Ştutgart» futbol toparynyň meýdançasy, çempionat döwründe — Stutgart Arena («Ştutgart Arena») diýlip atlandyrylar.
- Olympiastadion («Olimpiştadion», Olimpiýa stadiony), Berlin şäheri, «Gerta» futbol toparynyň meýdançasy — bu stadionyň ady üýtgewsizligine galýar.
- Volksparkstadion («Folksparkştadion»), Gamburg şäheri, «Gamburg» futbol toparynyň meýdançasy — bu stadionyň ady hem üýtgewsizligine galýar.
