Şenbe gününe geçilýän gije Germaniýada 2024-nji ýylyň futbol boýunça Ýewropa çempionaty başlaýar. Mýunhendäki “Alýans-Arenada” geçiriljek açylyş oýnunda Germaniýanyň milli ýygyndysy bilen Şotlandiýanyň milli ýygyndysy duşuşar. Jürlewük sesi ýarygije – Aşgabat wagty bilen 00:00-da ýaňlanar.
Duşuşyga Kleman Týurpeniň ýolbaşçylygyndaky fransiýaly eminler topary eminlik eder.
Ikinji oýun güni üç duşuşyk meýilleşdirilýär. Wengriýa we Şweýsariýa 18:00-da, Ispaniýa we Horwatiýa 21:00-da oýna başlar. 00:00-da bolsa Italiýa we Albaniýa duşuşar.
24 milli ýygyndy her bir dört topardan ybarat alty toparça bölündi. Toparlaýyn tapgyrda toparlar öz kwartetlerinde bir aýlawly ýaryş geçirerler. 1/8 finala toparçanyň iň gowy iki topary, şeýle-de öz kwartetlerinde üçünji orunlary eýelän toparlardan iň gowy dört topar çykar.
Pleý-off oýunlary 29-njy iýunda başlar. Final duşuşygy 14-nji iýulda Berlindäki Olimpiýa stadionynda geçiriler.
Türkmenistanda futbol muşdaklary “Ýewro-2024” oýunlaryny Матч ТВ we TRT 1 kanallarynda göni ýaýlymda görüp bilerler.
