Kriştianu Ronaldu ýokary derejede geçiren oýunlarynyň sany boýunça dünýä rekordyny goýdy. Ol Portugaliýanyň milli ýygyndysynyň Irlandiýa garşy ýoldaşlyk oýnunda meýdança çykyp, bu görkezijini 1226 oýna ýetirdi.
Halkara futbol taryhy we statistika federasiýasynyň (IFFHS) metbugat gullugy Ronaldunyň bu görkeziji boýunça Braziliýanyň milli ýygyndysynyň we “San-Paulunyň” öňki derwezebany Rožerio Seniden öňe geçendigini belledi. Onuň hasabynda 1225 oýun bar.
Ronaldu karýerasynyň dowamynda Portugaliýanyň, Angliýanyň, Ispaniýanyň, Italiýanyň we Saud Arabystanynyň çempionatlarynda 698 oýna gatnaşdy. Ýene 101 oýny bu ýurtlaryň kubok ýaryşlarynda we super kubok üçin oýunlarda geçirdi. Şeýle-de, hüjümçi halkara klub ýaryşlarynda 220 oýna we Portugaliýanyň milli ýygyndysy üçin 207 oýna gatnaşdy.
39 ýaşly Ronaldu “Altyn topuň” bäş gezek eýesi, Çempionlar ligasynyň bäş gezek ýeňijisi, Ýewropa çempiony, Milletler ligasynyň ýeňijisidir. Ol milli ýygyndylaryň, Ýewropa çempionatlarynyň, Çempionlar ligasynyň, Klublaýyn dünýä çempionatlarynyň taryhynda iň gowy bombardir hasaplanýar. Ronaldu karýerasynyň dowamynda Ispaniýanyň “Realy”, Angliýanyň “Mançester Ýunaýtedi”, Italiýanyň “Ýuwentusy” we Portugaliýanyň “Sportingi” üçin oýnady, häzir bolsa saud “Al-Nasrynyň” oýunçysydyr.
