Ýaponiýanyň Obayashi Corporation kompaniýasy Ýeriň orbitasyna barýan lifti gurmak baradaky meýilnamasyny yglan etdi diýip, Science Alert habar berýär.
Bahasy 100 milliard dollar bolar diýlip çaklanylýan bu taslama, takmynan 36 000 kilometr beýiklikdäki geostasionar orbita ýetýän ägirt uly gurluşygy öz içine alýar.
Belent binalary gurmakdaky üstünlikleri bilen tanalýan bu kompaniýa taslamany durmuşa geçirmek üçin özlerinde zerur bilimleriň we tehnologiýalaryň bardygyna ynanýar. Lifti gurmak üçin berkligi we ýeňilligi bilen tapawutlanýan uglerod nanoturbajyklaryny ulanmak göz öňünde tutulýar.
Gurluşyk işlerine 2025-nji ýylda başlanyp, 2050-nji ýyla çenli tamamlanar. Kompaniýa taslamany maliýeleşdirmeklige halkara hyzmatdaşlaryny çekmegi meýilleşdirýär.
“Kosmos lifti” adamlara raketa ulanmazdan, kosmosa syýahat etmäge mümkinçilik berer, bu bolsa kosmosa uçuşlaryň bahasyny ep-esli arzanladar. Şeýle-de bolsa, taslama birnäçe tehniki we maliýe kynçylyklary bilen ýüzbe-ýüz bolýar. Hususan-da, lifti tupan, ýyldyrym we ýer titremeleri zaýalap biler. Ýaponiýada bolsa ýylda 100-den gowrak ýertitreme bolýar.
Geostasionar orbitanyň Ýer ýüzünden, takmynan, 36 müň km belentlikde ýerleşip, planetanyň aýlanma tizligine laýyk gelýändigini bellemelidiris. Bu emeli hemranyň Ýerdäki ýere degişlilikde hemişe şol bir ýerde durjakdygyny aňladýar. “Kosmos liftiniň” aýlanma wagtynda döwülmeginiň öňüni almak üçin onuň beýikligi takmynan ýokarda agzalyşy ýaly bolmaly.
