Ýaponiýaly milliarder Ýusaku Maedzawa SpaceX kosmos gämisinde Aýyň töweregine ilkinji syýahatçylyk uçuşyny amala aşyrmagy meýilleşdirýän DearMoon taslamasynyň ýapylandygyny habar berdi.
Taslamanyň metbugat gullugynyň habarynda: "DearMoon taslamasynyň çäginde Aýyň töweregine amala aşyrylmagy meýilleşdirilen ilkinji hususy uçuşyň ýatyrylandygyny gynanç bilen size habar berýäris" -diýilýär.
Ýatyrmak baradaky karar uçurylyşyň yza süýşürilmegi we “ýakyn geljek üçin takyk meýilnamanyň” ýoklugy sebäpli kabul edildi.
“DearMoon 2023-nji ýylyň ahyryna çenli uçurylar diýen pikir bilen 2018-nji ýylda şertnama baglaşypdym. Emma munuň haçan amala aşjakdygy entek belli däl. Men beýle şertlerde geljegimi meýilleşdirip bilmerin we ekipažyň agzalaryny garaşdyrýanym üçin özümi oňaýsyz duýýaryn, ine şu hem taslamany ýatyrmak ýaly kyn karara gelmäge mejbur etdi "- diýip Maedzawa düşündirdi.
SpaceX 2017-nji ýylda Aýyň töweregine täjirçilik uçuşyny ýola goýmagy meýilleşdirýändigini mälim edipdi. Maezawa kosmos gämisindäki ähli ýerleri satyn almak bilen, bilelikdäki missiýa gatnaşjak topary yglan eden ilkinji ýolagçy bolupdy.
Netijede, toparyň düzümine dürli ýurtlardan bolan meşhur şahsyýetler girdi, ýagny, dijeý Stiw Aoki, blogçy Tim Dodd, amerikaly režissýor Brendon Holl, şeýle hem Günorta Koreýanyň TOP ýerine ýetirijisi, irlandiýaly suratkeş Riannon Adam, çehiýaly telekeçi we prodýuser Ýemi A.D., hindi aktýory Dew Joşi we iňlis suratçysy Karim Iliýa.
Maedzawa eýýäm 2021-nji ýylda rus “Soýuz”-ynda HKS-na uçup, kosmosa syýahat etdi.
