Kibersport bilen adaty sport görnüşlerini birleşdirýän ikinji “Geljegiň oýunlary” 2025-nji ýylda Birleşen Arap Emirliklerinde geçiriler. Bu barada taslamanyň ýolbaşçysy Igor Stolýarowa salgylanyp, “Ekspert” portaly habar berýär.
Öň, ýaryşy Gazagystanyň kabul etmäge taýýardygy habar berlipdi.
2024-nji ýylda Kazanda geçirilen ilkinji ýaryş 116 ýurtdan, şol sanda Türkmenistandan 2000-den gowrak türgeni ýygnady. Türkmenistanyň Oguz han adyndaky Inžener-tehnologiýalar uniwersitetinden 14 talypdan we 1 mugallymdan ybarat milli ýygyndy fijital-futbol we fijital-basketbol boýunça ýaryşlara gatnaşdy.
Gatnaşyjylar kompýuter oýunlaryny fiziki synaglar bilen utgaşdyrýan 21 dissiplinada bäsleşdiler. Birinji “Geljegiň oýunlarynyň” baýrak gaznasy 10 mln dollar boldy.
BAE-de “Geljegiň oýunlary – 2025-iň” has gerimli bolmagyna we has köp tomaşaçyny ýygnamagyna garaşylýar.
