Iki gezek Çempionlar ligasynyň ýeňijisi Žoze Mourinýu Türkiýäniň “Fenerbahçe” toparynyň baş tälimçisi wezipesine bellenildi. Bu barada futbol klubunyň X sosial ulgamyndaky akkauntynda habar berilýär.
Şertnama gol çekişligiň we tälimçini tanyşdyryşyň ýekşenbe güni gijräk geçirilmegine garaşylýar.
61 ýaşly portugaliýalynyň öňki iş ýeri “Roma” klubundady, ony ýanwar aýynda terk etdi.
2021/2022-möwsüminde Mourinýu topar bilen Konferensiýalar ligasynda ýeňiş gazanyp, rimlileri ilkinji ýewrokubok ýeňşine getirdi. 2022/2023-möwsüminde “Roma” Mourinýunyň ýolbaşçylygynda Ýewropa ligasynyň finalyna çykdy we bu ýerde Ispaniýanyň “Sewilýasyndan” oýundan soňky penalti tapgyrynda utuldy. Mourinýu Rim klubundan öň “Çelsä”, Madridiň “Realyna”, Italiýanyň “Interine”, Portugaliýanyň “Portu”, “Leýriýa”, “Benfika” toparlaryna tälimçilik etdi. Tälimçi hökmünde Çempionlar ligasynda we Ýewropa ligasynda (öň – UEFA-nyň Kubogy) iki gezek, Konferensiýalar ligasynda bir gezek ýeňiş gazandy.
