Jon Lennonyň we Jorj Harrisonyň “Help!” we “Rubber Soul” (ikisi hem 1965) albomlaryny ýazanlarynda oýnan akustiki gitarasy Julien’s Auctions auksionynda 2,85 million dollara satyldy.
Lennonyň 12 kirişli Framus Hootenanny gitarasy Beatles-iň iň gymmat saz guralyna we auksionda satylan iň gymmat bäşinji gitara öwrüldi. Telefon arkaly auksiona gatnaşan alyjy adynyň aýdylmazlygyny isledi.
Germaniýanyň “Framus” kompaniýasy tarapyndan 1960-njy ýyllaryň başynda ýasalan gitara The Beatles-iň “It Is Only Love”, “I Have Just Seen a Face”, “Girl” aýdymlarynda we “Help!” filminde peýda boldy.
Julien’s Auctions auksionynyň müdiri Darren Julian gitarany "hakyky hazyna" diýip atlandyrdy we ony "Rembrandt ýa-da Pikassonyň ýitiren eserine" deňedi. Onuň aýtmagyna görä, bu gural tapylmazdan we auksiona çykarylmazdan ozal Beýik Britaniýadaky bir jaýyň üçeginde takmynan 50 ýyl ýatypdyr.
Bu gitara Lennona The Beatles bilen hyzmatdaşlyk eden Piter & Gordon pop-duetiniň agzasy Gordon Uoller tarapyndan berildi. Gitaranyň asyl gaby hem tapyldy we Julianyň aýtmagyna görä, ol "tas zibile taşlanypdy".
Gitaranyň hakykylygyny The Beatles taryhçylary Endy Babýuk we Denny Bennet tassykladylar.
