Pompeýlerde arheologlar b.e.öňki 79-njy ýylda meşhur gadymy Rim şäheri Wezuwiýanyň külüniň astynda galmazdan ozal çagalar tarapyndan çekilen diwar suratlaryny tapdylar. Tapyndy hakda The Guardian neşiri ýazýar.
Kömür bilen çekilen suratlar ýaňy-ýakynda üsti açylan Casa del Secondo Cenacolo Colonnato (Ikinji Syrly agşam naharynyň berlen sütünli öýi) howlusynyň harabalyklarynyň arasyndan tapyldy.
Suratlarda biri-birine seredýän iki gladiator şekillendirilipdir, gapdalynda wenitio- aw oýunlary sahnasy, şeýle hem uzyn naýza bilen ýaraglanan iki söweşiji bar. Olar bir jübüt ýabany doňuz bilen söweşjek bolýana meňzeýär. Sagda ýyrtyjy guşuň kellesi, megerem bürgüt bolsa gerek.
Suratlaryň arasynda çagalaryň elleriniň kömürde çyzylan sudurlary bar. Elleriň ölçeginden çen tutsaň, suratlaryň 5-7 ýaş aralygyndaky çagalar tarapyndan döredilendigini çaklamak bolar.
Suratlar poluň derejesinden takmynan 1,5 metr ýokarda, gullukçylaryň howlusynyň golaýyndaky däliziň diwarlarynyň birinde tapyldy. Çagalar, megerem, gurluşyk agaçlarynyň üstüne çykan bolsalar gerek.
Alymlaryň pikiriçe, bu egrem-bugram çyzgylar gadymy rimlileriň pikirleniş usulyna has gowy düşünmäge mümkinçilik berýär. Gadymy rim çagalary ganly çaknyşyklara tomaşa etmek üçin amfiteatrlara baryp gören bolsalar gerek.
Arheologlar başga-da artefaktlary, şol sanda freskli banket zalyny we wulkanyň iki pidasynyň jesedini tapdylar.
