Hindi ummanyndaky kaşaň jaýlary, saýlama mekdepleri we ýaht-klublary bilen tanalýan Awstraliýanyň Pert şäheri, soňky döwürde bu ýerde maşgala ofislerini açmak isleýän millionerleri özüne çekýär.
Däp bolşy ýaly, aşa ýokary girdejili müşderilere hyzmat edýän maşgala ofisleriniň merkezleri Dubaý, London, Nýu-Ýork we Singapur ýaly megapolisler hasaplanýardy. Şeýle-de bolsa, soňky ýyllarda kiçi we has uzak şäherleriň meşhurlygy artdy we Pert dünýäniň izolirlenen esasy şäherleriniň biri hökmünde tanalýar.
Bloomberg-iň habaryna görä, Pertde eýýäm 64 sany sentimillioner, ýagny 100 million dollar ýa-da ondanam köp baýlygy bolan adamlar ýaşaýar, bu bolsa ony dünýäniň iň baý şäherleri bilen bir hatarda goýýar.
Pertiň özüne çekijiligi, megapolislerden uzaklygy, amatly howa şertleri we ösen infrastrukturasy bilen baglanyşyklydyr.
Mundan başga-da, şäherde baý adamlaryň köpelmegine, ol ýerde dag-magdan senagatynyň ösüşiniň başlanmagy sebäp boldy. Bu faktor maşgala ofisleriniň sanynyň mundan beýläk-de köpelmegine we täze maýa goýum mümkinçilikleriniň döremegine goşant goşýar.
Hünärmenler, Pert ýaly şäherlerde maşgala ofisleriniň ýerleşiş tendensiýasynyň ýakyn ýyllarda artjakdygyny çaklaýarlar.
