Gazagystanyň medeniýet we maglumat ministri Aida Balaýewa Magtymguly Pyragy adyndaky halkara edebiýat baýragyny döretmegi teklip etdi diýip, Bigasia habar berýär.
Degişli teklip 20 ýurduň medeniýet ministrleriniň gatnaşmagynda akyldar şahyryň 300 ýyllygyna bagyşlanyp geçirilen halkara maslahatynda beýan edildi.
Aida Balaýewa şeýle hem Astanada Magtymguly Pyragynyň heýkelini oturtmak boýunça alnyp barylýan işler barada gürrüň berdi. Bu ýadygärlik gazak halkynyň bu şahyra we tutuş türkmen halkyna hormatynyň we dostlukly gatnaşyklarynyň nyşany bolar diýlip neşirde bellenilýär.
Ýatlatsak, 2024-nji ýyl Türki medeniýetiň halkara guramasy tarapyndan Magtymguly Pyragy ýyly diýlip yglan edildi. Şahyryň ýubileýi şeýle hem ÝUNESKO bilen bilelikde 2024-2025-nji ýyllarda bellenilip geçiljek seneleriň sanawyna girizildi.
