Google Afrika bilen Awstraliýany gönüden-göni birleşdirjek ilkinji suwasty optiki süýümli kabeliň gurluşygyna başlanandygyny habar berdi. TechCrunch portalynyň ýazmagyna görä, Umoja (suahili dilinden terjime edilende “bitewilik” diýmegi aňladýar) diýlip atlandyrylan taslama Afrika ýurtlarynda tora birikmegiň ygtybarlylygyny ýokarlandyrmak we olaryň dünýä internetine elýeterliligini gowulandyrmak üçin döredildi.
Täze kabel Gündogar we Günorta Afrikanyň birnäçe ýurtlaryny (Keniýany, DR Kongony, Ruandany, Ugandany, Zambiýany we Zimbabwany) birleşdirip, Google-yň ilkinji Afrika maglumat merkeziniň ýerleşýän Günorta Afrikasyna baryp, infrastrukturanyň möhüm elementine öwrüler.
Ugruň ýerüsti bölegi Liquid Intelligent Technologies kompaniýasynyň kömegi bilen eýýäm goýuldy. Kabeliň suwasty bölegi yklymlary birleşdirmek bilen Hindi ummanyndan geçer. Taslamanyň 2026-njy ýyla çenli tamamlanmagyna garaşylýar.
Umoja suwasty kabellere zeper ýetmegi sebäpli ozal ep-esli bökdençlik çekýän sebitde toruň durnuklylygyny ýokarlandyrar.
Global tor infrastrukturasy boýunça Google Cloud-yň wise-prezidenti Braýan Kuigliniň sözlerine görä, täze kabel Afrika ýurtlary bilen dünýäniň beýleki ýurtlarynyň arasynda has ygtybarly aragatnaşygy üpjün eder, bu sebitiň ösüşi üçin möhüm ähmiýete eýe bolar.
Suwasty kabelleri çekmek Google, Amazon, Meta we Microsoft ýaly iri tehnologiýa kompaniýalary üçin strategiki ugur bolup durýar. Bu infrastruktura maýa goýmak, goý, ol öý ulanyjylary üçin akym hyzmatlary bolsun ýa-da kärhanalar üçin bulut hasaplamasy - tapawudy ýok, ulanyja edilýän hyzmatyň hilini ýokarlandyrmaga kömek edýär.
