Google kompaniýasy Tehas ştatynyň (ABŞ) ýaşaýjylarynyň şahsy maglumatlarynyň gizlinligini bozandygy baradaky aýyplamalary çözmek üçin, ştata 1,375 mlrd dollar tölemäge razy boldy. Bu barada Tehasyň baş prokurory Ken Pakston habar berdi.
2022-nji ýylda Tehasyň prokuraturasy Google kompaniýasyna garşy iki sany kazyýet işi bilen ýüz tutupdy. Kompaniýa geolokasiýa maglumatlaryny, inkognito (gizlinlik) režimindäki gözleg maglumatlaryny we biometriki maglumatlary bikanun ýygnamaklykda aýyplandy. Prokuraturanyň beýanatynda bellenilişi ýaly, bu öz görnüşindäki iň uly ylalaşykdyr. Mundan ozal hiç bir ştat Google-dan şeýle düzgün bozulmalar üçin 93 mln dollardan köp pul alyp bilmändi.
2024-nji ýylda Tehas ştaty Meta-dan, ýagny Facebook we Instagram-yň enelik kompaniýasyndan ulanyjylaryň biometriki maglumatlaryny rugsatsyz ulanandygy üçin, 1,4 mlrd dollar alypdy.
«Tehasta iri tehnologiýa kompaniýalary kanundan üstün däldir» — diýip, Pakston aýtdy. Onuň sözlerine görä, Google öz hyzmatlarynyň üsti bilen adamlaryň hereketleriniň yzyny, gözleg taryhyny, ses ýazgylaryny we ýüzüniň geometriýasy baradaky maglumatlary gizlin ýagdaýda ýygnapdyr.
Google kompaniýasynyň wekili Hose Kastaneda bu ylalaşyk bilen kompaniýanyň günäni ýa-da jogapkärçiligi boýun almaýandygyny aýtdy. Kazyýet işi Chrome brauzerindäki inkognito režiminiň sazlamalaryna, Google Maps-de ýerleşýän ýer taryhyna we Google Photos-daky biometriki maglumatlaryň ulanylyşyna degişli bolupdyr. Kastaneda bu ylalaşyk sebäpli Google-yň önümlerine hiç hili üýtgeşmäniň girizilmejekdigini, kompaniýanyň syýasatyndaky ähli üýtgeşmeleriň öň yglan edilendigini ýa-da eýýäm güýje girendigini belläp geçdi.
