2024-nji ýylyň oktýabr aýynda Ermenistanyň Türkmenistandaky Medeniýet günleri geçiriler. Bu baradaky mesele ýakynda Aşgabat şäherinde Magtymguly Pyragynyň doglan gününiň 300 ýyllygyna bagyşlanyp medeniýet ministrleri derejesindäki halkara maslahatyň çäklerinde Türkmenistanyň Medeniýet ministri Atageldi Şamyradow bilen Ermenistanyň Bilim, ylym, medeniýet we sport ministri Žanna Andreasýanyň duşuşygynda ara alnyp maslahatlaşyldy.
Duşuşykda medeniýet pudagyndaky ikitaraplaýyn hyzmatdaşlyk meseleleri ara alnyp maslahatlaşyldy. Taraplar ilkinji nobatda iki döwletiň döwlet ýolbaşçylarynyň medeni-gumanitar ugrundaky hyzmatdaşlygy ösdürmege aýratyn üns berýändiklerini bellediler.
Türkmenistan bilen Ermenistanyň arasynda medeni-gumanitar ugrunda ýetilen anyk sepgitler we ýola goýlan ýakyndan hyzmatdaşlyk bar. Iki döwletiň medeniýet günleri yzygiderli geçirilýär. Türkmenistanyň Ermenistandaky Medeniýet günleriniň 2023-nji ýylda geçirilendigini bellemek bolar.
Şol bir wagtda Ermenistanyň simfoniki orkestriniň ýerine ýetirmeginde ermeni kompozitory Arno Babajanýana bagyşlanan konsertiniň Aşgabat şäherinde geçirilmegi baradaky meseläniň üstünde durup geçdiler.
