24-nji maýda Prezident Serdar Berdimuhamedow bilen RF-niň Premýer-ministri Mihail Mişustiniň arasynda geçirilen duşuşykda iki ýurduň arasynda ynsanperwer ulgamda hyzmatdaşlyk, şol sanda Türkmenistanda rus diline ýöriteleşdirilen mekdepleriň gurluşygy, şeýle hem sebitara gatnaşyklary ösdürmek meseleleri maslahatlaşyldy.
"Biz bilim ulgamymyz barada gepleşikleri geçirdik" - diýip, Mişustin duşuşygyň netijeleri boýunça belledi. Mişustin häzirki wagtda Russiýada Türkmenistandan 40 müňden gowrak talybyň bilim alýandygyny, şolardan 7,5 müňüsiniň rus hökümetiniň talyp hakyny alýandygyny nygtady.
"Rus mekdepleriniň gurluşygy, institutlaryň, uniwersitetleriň şahamçalaryny açmakda hyzmatdaşlygy dowam etmek barada gürrüňdeş bolduk" - diýip, ol belledi.
Şeýle hem RF-niň Premýer-ministri şu ýylda Türkmenistan üçin möhüm senäniň - Magtymguly Pyragynyň doglan gününiň 300 ýyllygynyň bellenilýändigine ünsi çekdi. "Biz hem Russiýada bu şahsyýete bagyşlanan köp sanly çäreleri geçireris" diýip, rus Hökümetiniň Başlygy belledi.
