Niderlandlaryň Feadship gämi abatlaýyş kärhanasy dünýädäki ilkinji wodorod ýahtasy bolan Project 821-i ulanyşa girizdi. Bu Niderlandlarda gurlan iň uly ýahtadyr diýip, “Haýtek” ýazýar.
Project 821-iň uzynlygy 119 metr, ini - 19 metr. Bu ýahtanyň esasy aýratynlygy – onuň iň ýeňil himiki element bolan wodorodda işleýän elektrik stansiýasynyň bolmagydyr. 1 m³ suwuk wodorodyň agramy bary-ýogy 70 kg, bu dizel ýangyjynyň 1 m³-den 10 esse az.
Şol bir wagtda wodorody saklamagyň ep-esli tehniki kynçylyk döredýändigini bellemelidiris. Munuň üçin inženerler ýahtanyň palubasynyň aşagyna -253 ° C-den gaty pes temperaturada 92 m³ (takmynan 4 tonna) wodorody saklap bilýän ýörite rezerwuar ýerleşdirdiler.
Project 821 hemişe wodorodda işläp bilmeýär. Şeýle-de bolsa, portlara girilende, ekologiýa taýdan arassa ýerlerde ýüzülende ýa-da ýahta gämi duralgasynda yşyklaryny ýakmak, ýyladyş we kondisioner üçin wodorody ýuwaşlyk bilen ulananda “ýaşyl” režime geçmek mümkinçiligi göz öňünde tutulandyr.
Ýahtanyň wodoroddaky iň ýokary tizligi sagatda 18 km.
Project 821-de daşky gurşawa zyýansyzlyk we rahatlyk özara sazlaşýar diýip bellenýär. Bu ýahtada iki ýatylýan otag, iki hammam otagy, iki geýim otagy, iki ofis otagy (her birinde diwarojak we myhman otagy bar), sport zaly, kitaphana, naharhana, ammar we lift bar. Mundan başga-da, ýahtanyň burun tarapynda doly bahaly gezelenç palubasy we jakuzi bar.
