Dünýäde iň ýokary öndürijilikli superkompýuterleriň täzelenen Top-500 reýtingi hödürlendi. Sanawyň ilkinji bäş orny üýtgewsiz galdy. Eýýäm üçünji gezek birinji orny ABŞ-nyň Energetika ministrliginiň Ok-Rij milli barlaghanasyndan Frontier superkompýuteri eýeleýär diýip, Habr portaly habar berýär.
8,7 million AMD EPYC 64C 2GHz prosessor ýadrosy bilen üpjün edilen Frontier 1,206 ekzaflops öndürijiligi görkezýär. Bu reýtingdäki beýleki superkompýuterlerden ep-esli ýokarydyr.
Ikinji orunda ABŞ-nyň Argonn milli barlaghanasyndan Aurora klasteri ýerleşdi. Onuň öndürijiligi ýadrolaryň sanynyň 4,8 milliondan 9,2 milliona çenli artdyrylmagynyň netijesinde 585 petaflopsdan 1,012 ekzaflopsa çenli ýokarlandy.
Üçünji orny Microsoft kompaniýasynyň Eagle superkompýuteri eýeledi. Ol 2 million Xeon Platinum 8480C 48C 2GHz prosessor ýadrosyna eýe bolup, 561 petaflops öndürijiligi berýär.
Dördünji orunda RIKEN fiziki-himiki gözlegler institutyndan ýapon superkompýuteri Fugaku, bäşinji orunda Finlýandiýadaky Ýewropa superkompýuter merkeziniň (EuroHPC) LUMI superkompýuteri ýerleşdi.
Belläp geçsek, reýtingde 171 sany superkompýuter (umumy öndürijiligiň 34,2%-i) bilen ABŞ agdyklyk edýär. Hytaý 80 sistema (16%) bilen ikinji orny eýeleýär. Olaryň yzyndan Germaniýa (40), Ýaponiýa (29), Fransiýa (24), Beýik Britaniýa (16), Günorta Koreýa (13), Italiýa (11), Kanada (10) we Niderlandlar (9) gelýär.
Operasion sistemalaryň reýtinginde henizem Linux öňdebaryjydyr, prosessorlaryň arasynda bolsa CPU Intel agdyklyk edýär. Ýarym ýylyň içinde reýtingiň ähli sistemalarynyň umumy öndürijiligi 7-den 8,2 ekzaflopsa çenli, prosessor ýadrolarynyň sany bolsa 106,3 milliondan 114,6 milliona çenli ýokarlandy.
