Portugaliýanyň milli ýygyndysynyň we “Al-Nasr” klubunyň hüjümçisi Kriştianu Ronaldu “Forbes” žurnaly tarapyndan 2024-nji ýylda iň köp girdeji alýan türgen hökmünde bellendi. Bu barada RIA Nowosti habar berýär.
Soňky 12 aýda Ronaldu 260 mln dollar gazandy, şolardan 200 mln dollary Saud Arabystanynyň kluby bilen baglaşylan şertnama üpjün etdi, ýene 60 mln dollary ol dürli hemaýatkärlik şertnamalaryndan gazandy.
Ikinji orna 29 ýaşly ispaniýaly golfçy Jon Ram (218 mln dollar) çykdy. 2022-nji ýylyň reýtinginde birinji orny we 2023-nji ýylda ikinji orny eýelän argentinaly futbolçy Lionel Messi ýene bir setir aşak düşüp, 135 mln dollar bilen üçünji orunda ýerleşdi.
Şeýle-de, ilkinji onluga basketbolçylar Lebron Jeýms (4-nji orun, 128,2 mln dollar), Ýannis Adetokunbo (5, 111 mln dollar) we Stefen Karri (9, 102 mln dollar), futbolçylar Kilian Mbappe (6, 110 mln dollar), Neýmar (7, 108 mln dollar) we Karim Benzema (8, 106 mln dollar), şeýle-de amerikan futbolynyň oýunçysy Lamar Jekson (10, 100,5 mln dollar) girdi.
