Şwesiýanyň Malmýo şäherinde "Ýewrowideniýe-2024" aýdym-saz bäsleşiginiň finaly geçirildi. Şweýsariýaly ýerine ýetiriji Nemo "The Code" aýdymy bilen ýeňiji boldy. Ikinji orny Horwatiýadan aýdymçy Baby Lasagna, üçünji orny Ukrainadan ýerine ýetirijiler dueti Alyona Alyona & Jerry Heil eýeledi. Bu barada BBC habar berýär.
Fransiýa dördünji orunda ýerleşdi, bäşinji orny bolsa Ysraýyldan aýdymçy Eden Golan eýeledi. Olaryň yzyndan Irlandiýa, Italiýa, Ermenistan, Şwesiýa, Portugaliýa, Gresiýa, Germaniýa, Lýuksemburg, Litwa, Kipr, Latwiýa we beýlekiler gelýär.
Ýeňijilere iň ýokary 12 baly Çehiýadan we Moldowadan emin agzalar berdi, Estoniýadan, Fransiýadan we Polşadan bolsa olar 10 bal aldylar.
Belläp geçsek, finala bir gün galanda, anna güni agşam ýeňiji bolmaga dalaşgärleriň biri bolan Niderlandlaryň wekili Ýost Klýaýnyň finala gatnaşmajakdygy belli boldy. Bäsleşigiň guramaçylary aýdymçynyň "ýerliksiz hereketi üçin" - sahnanyň aňyrsynda bolan nähilidir bir wakadan soň bäsleşikden çetleşdirilendigini aýtdylar.
Klýaýnyň özi şeýle çözgüde geň galandygyny we jezanyň öz hereketi bilen deň gelmeýändigini aýdýar. Häzirki wagtda anna güni sahnanyň aňyrsynda nämäniň bolup geçendigi Şwesiýanyň polisiýa işgärleri tarapyndan derňelýär.
