BMG-niň Bilim, ylym we medeniýet meseleleri boýunça guramasy (ÝUNESKO) Aýda planetamyzyň medeni gymmatlygy baradaky bilimler bilen bir hatarda Ýer ýüzündäki dilleriň 275-isi barada maglumatlary saklap galmagy maksat edinýär. Maglumatly kapsula Ýaponiýanyň Ispace hususy kompaniýasynyň Hakuto-R awtomatik modulynyň bortuna ýerleşdiriler. Bu barada guramanyň resmi saýtynda habar berilýär.
ÝUNESKO bu arhiwiň global betbagtçylyk bolan ýagdaýynda adamzat baradaky käbir maglumatlary gorap saklamaga kömek etjekdigini belleýär.
Ispace-iň ilkinji Hakuto-R Aýa gonuş moduly 2022-nji ýylyň dekabr aýynda kompaniýanyň synag missiýasynyň çäklerinde uçuryldy. 2023-nji ýylyň 25-nji aprelinde Aýa gonmaga synanyşyk wagtynda enjam bort kompýuterindäki ýalňyşlyk sebäpli döwüldi.
Ispace-iň Aýyň üstüne ýetmek boýunça indiki synanyşygy 2024-nji ýylyň gyşyna meýilleşdirilýär. Täze Hakuto-R modeli bilen bilelikde Ýeriň hemrasyna kiçiräk lunohod iberiler.
Ispace üçünji Aý missiýasyny-da meýilleşdirýär, ol 2026-njy ýylda bolmaly. Oňa 500 kg çenli peýdaly ýük götermäge ukyply bolan has uly we döwrebap Apex 1.0 moduly gatnaşar.
