Lewerkuzeniň "Baýeri" Ýewropa ligasynyň ýarym finalynyň jogap duşuşygynda "Roma" bilen deňme-deň oýnap (2:2), ýaryşyň finalyna çykdy. Jogap duşuşygy Germaniýada geçirildi.
Duşuşygyň barşynda ýer eýeleri 0:2 utulyp gelýärdiler. "Romanyň" düzüminde argentinaly ýarym goragçy Leandro Paredes 2 gezek 11 metrlik jerime urgusyndan gol geçirdi (43, 66-nji minutlar). 83-nji minutda "Romanyň" goragçysy Janluka Mançini öz derwezesine gol geçirdi. Duşuşygyň ikinji ýarymyna goşulan goşmaça wagtyň iň soňky minudynda "Baýeriň" goragçysy Ýosip Stanişiç hasaby deňläp (97-nji minutda), toparyna deňme-deňlik getirdi.
Iki oýnuň jemi boýunça "Baýer" (2:0, 2:2) Ýewropa ligasynyň finalyna çykdy. Şol bir wagtda nemes kluby ýeňlişsiz oýunlarynyň sany boýunça (49 oýun) Ýewropa futbolynyň rekordyny täzeledi. Habi Alonsonyň şägirtleri şu möwsümde bir gezek hem ýeňilmediler: 40 ýeňiş we 9 deňme-deňlik.
"Baýer" "Benfika" portugal klubunyň rekordyny täzeledi. Portugal kluby 1963-nji ýylyň 22-nji dekabryndan başlap, 1965-nji ýylyň 7-nji fewraly aralygynda ähli ýaryşlarda 48 gezek ýeňilmän geldi.
"Baýer" Ýewropa ligasynyň finalynda taryhynda ikinji gezek oýnar: 1988-nji ýylda klub Ispaniýanyň "Espanýol" toparyny ýeňip, UEFA Kubogyny eýeläpdi.
"Baýer" bilen "Atalantanyň" arasyndaky final duşuşygy Dublinde (Irlandiýa) 23-nji maýa geçilýän gije geçiriler.
Möwsümiň ahyryna çenli "Baýerde" ýene 3 duşuşyk galdy: Germaniýanyň çempionatynda 2 oýun we ýurduň Kubogynyň finalynda "Kazzerslauterna" garşy 1 oýun.
