Hytaýyň Ýeňil awtomobiller assosiasiýasynyň (CPCA) maglumatlaryna görä, 2024-nji ýylyň mart aýynda Hytaýda awtomobil satuwy dünýädäki umumy awtomobil satuwynyň 33%-ini emele getirdi (8,15 mln). 2024-nji ýylyň birinji çärýeginde dünýäde 21,05 mln awtomobil satyldy, bu geçen ýyl bilen deňeşdirilende, 3% köpdür diýip, ixbt.com belleýär.
2016-njy ýyldan 2018-nji ýyl aralygynda hytaý awtomobilleriniň satuwy global awtomobil satuwynyň, takmynan, 30%-ini emele getirdi, soň 2019-njy ýylda 29%-e çenli pese gaçdy. 2020 – 2021-nji ýyllarda bu paý 32%-e çenli artdy, 2022-nji ýylda bolsa 33%-e ýetdi.
2024-nji ýylda awtoöndürijileriň satuwynyň global reýtinginde Toyota 10,6% paý bilen birinji orny eýeledi. Ol 10%-den gowrak bazar paýy bolan ýeke-täk awtomobil toparydyr, onuň yzyndan, degişlilikde, 9,5% we 7,4% paý bilen Volkswagen we Hyundai gelýär. Bu kompaniýalaryň üçüsi bilelikde global bazar paýynyň 27,5%-ini emele getirdi.
Hytaý kompaniýalarynyň arasynda Geely iň gowularyň onlugyna giren ýeke-täk awtoöndürijidir. 2024-nji ýylyň birinji çärýeginde Geely 738 400 awtomobil satdy we bu global bazar paýynyň 3,5%-ine deňdir. BYD 3,2% bazar paýyny aldy.
Mundan başga-da, 2024-nji ýylyň birinji çärýeginde Hytaýyň iň uly awtoeksportçylarynyň bäşligine SAIC, Chery, Great Wall Motor, BYD we Geely girdi.
