Apple ABŞ-nyň taryhynda iň uly paýnamalary yzyna satyn alşy yglan etdi. Kompaniýanyň müdirler geňeşi 110 mlrd dollarlyk goşmaça paýnamalaryň yzyna satyn alynmagyny tassyklady diýip, RBK ýazýar.
Smartfon öndürijisi öz rekordyny täzeledi. 1999-njy ýyldan bäri ABŞ-da paýnamalary yzyna satyn alyş statistikasyny yzarlaýan Birinyy Associates gözleg kompaniýasynyň maglumatlaryna görä, 2018-nji ýylda kompaniýa 100 mlrd dollarlyk paý satyn alşy habar berdi. 2021, 2022 we 2023-nji ýyllarda kompaniýa 90 mlrd dollarlyk yzyna satyn alyş maksatnamalaryny yglan etdi.
Umuman, häzire çenli ABŞ-da paýnamalary yzyna satyn alyş baradaky iň uly on bildirişiň altysy kompaniýanyň paýyna düşýär. Şeýle-de, iň uly baýbekli kompaniýalaryň sanawyna 2023-nji ýylyň ýanwar aýynda 75 mlrd dollarlyk yzyna satyn alşy yglan eden Chevron nebit korporasiýasy we 2024-nji ýylyň aprel aýynda 70 mlrd dollarlyk gymmatly kagyzlaryny satyn alyş barada yglan eden Alphabet holdingi girýär.
Penşenbe güni, 2-nji maýda NASDAQ biržasynda geçirilen esasy söwdanyň netijesi boýunça, Apple kapitalizasiýasy boýunça dünýäde ikinji orny eýeleýär, kompaniýanyň bahasy 2,67 trln dollar. Bu görkeziji boýunça Apple diňe bazar bahasy 2,96 trln dollar bolan Microsoft-dan yza galýar.
3-nji maýda Apple-iň paýnamalary 5,76% - 183,1 dollara çenli gymmatlady. Ýylyň başyndan bäri kompaniýanyň paýnamalary, takmynan, 5% peseldi.
