Amerikanyň Birleşen Ştatlarynyň hirurglary genetiki taýdan üýtgedilen doňuz böwregini mehaniki ýürek nasosynyň implantasiýasy bilen bilelikde göçürmek boýunça dünýäde ilkinji utgaşykly operasiýany amala aşyrdylar diýip, Rambler habar berýär.
Ýürek ýetmezçiliginden we böwrek keselinden ejir çeken 54 ýaşly Liza Pizano beýleki ötüşen keselleri we donor organlarynyň ýetmezçiligi sebäpli adaty transplantasiýany alyp bilmändi.
Lukmanlar oňa ksenotransplantasiýany, ýagny haýwan organyny transplantasiýa etdirmegi teklip etdiler. Adamyň antibedenleriniň organy ret etmeginiň öňüni almak üçin doňuz böwreginiň DNK-syna üýtgeşmeler girizildi.
Operasiýa iki basgançakdan ybarat boldy: 4-nji aprelde ýürek nasosy oturdyldy we 12-nji aprelde wiloçkaly mäz bilen bilelikde genetiki taýdan üýtgedilen böwrek göçürildi, bu immunitetiň organy “özüniňki” diýip tanamagyna kömek edýär we ret etmek ähtimallygyny peseldýär.
Bu genetiki taýdan üýtgedilen doňuz böwreginiň taryhda janly adama ikinji gezek göçürilmegi we wiloçkaly mäz bilen bilelikde ilkinji transplantasiýa boldy. Operasiýadan soň näsag Liza Pizano özüni has gowy duýýar, ýüregi we böwrekleri öz funksiýalaryny ýerine ýetirýärler.
