“Oskar” baýragynyň eýesi Emma Stoun we režissýor Neýtan Filder A24 studiýasy bilen bilelikde täze taslamanyň - “Küşt” komediýasynyň üstünde işläp başladylar diýip, The Hollywood Reporter habar berýär.
Filmde norwegiýaly Magnus Karlsen bilen amerikaly grossmeýster Hans Nimannyň arasyndaky dawaly küşt döwi barada gürrüň berler.
2022-nji ýylda Sent Luisde (Missuri ştaty, ABŞ) geçirilen Sinkfild kubogynda şol wagtky dünýä çempiony Karlsen garaşylmadyk ýagdaýda ýaş we o diýen tanalmaýan grossmeýsterden ýeňlişe sezewar boldy, şondan soň ol garşydaşyny aldawçylykda aýyplady.
Filmiň edebi esasynda ýazyjy Ben Mezriçiň pikiri ýatar. Stoun prodýuseri bolar we Filder režissýorlyk eder. Baş keşplerde kimleriň oýnajagy entek belli däl.
