Paýtagtymyzdaky Döwletliler köşgünde terbiýelenýän çagalar Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň goldaw bermeginde Türkiýede bolup, her ýylyň 23-nji aprelinde bellenilýän Milli özygtyýarlylyk we çagalar güni mynasybetli geçirilýän medeni çärelere gatnaşdylar.
Türki Döwletler Guramasynyň Aksakgallar geňeşi tarapyndan taýýarlanylan medeni maksatnama laýyklykda Döwletliler köşgünde terbiýelenýän çagalar doganlyk ýurduň Ankara we Stambul şäherlerinde geçirilen çärelere gatnaşdylar.
Döwletliler köşgünde terbiýelenýän çagalar medeni maksatnamanyň çäklerinde Atatürkiň aramgähine baryp gördüler. Şeýle hem olar Türkiýäniň Beýik millet mejlisine baryp gördüler.
Aşgabadyň Döwletliler köşgünde terbiýelenýän çagalary Türkiýe Respublikasynyň Prezidenti Rejep Taýyp Ärdogan kabul etdi. Olar türk topragynda mähirli kabul edilendikleri we çäreleriň ýokary guramaçylyk derejesiniň üpjün edilendigi üçin doganlyk ýurduň Prezidentine tüýs ýürekden sag bolsun aýtdylar.
Şeýle hem çagalaryň türk dilinde okan goşgulary we Türkmenistanyň Prezidentiniň “Ýaşlar—Watanyň daýanjy” atly kitabynyň türk diline terjime edilen nusgasynyň Türkiýäniň Prezidentine çuňňur hoşallygyň nyşany hökmünde sowgat gowşurylmagy tolgundyryjy pursatlara öwrüldi. Aýratyn-da, Türkiýe Respublikasynyň Prezidenti türkmen halkynyň milli gymmatlyklary bolan türkmen tahýasynyň we dutarynyň özüne bildirilen hormatyň nyşany hökmünde kabul edýändigini nygtady we munuň üçin türkmen çagalaryna we olaryň üsti bilen Gurbanguly Berdimuhamedowa, Serdar Berdimuhamedowa we doganlyk türkmen halkyna tüýs ýürekden hoşallyk bildirdi.
