Hindistan ilat sany boýunça dünýäde birinji orny eýeledi. Ol häzir 1,442 mlrd adam diýlip hasaplanýar. Ikinji orunda 1,425 mlrd ýaşaýjy bilen Hytaý ýerleşýär. Bu barada BMG-niň Ilat gaznasynyň (UNFPA) hasabatyna salgylanyp, TASS habar berýär.
Gazna Hindistanyň ilatynyň köpelmegini ýurtda sosial-ykdysady ýagdaýyň gowulaşmagy we eneleriň ölüm derejesiniň peselmegi bilen baglanyşdyrýar. UNFPA-nyň hasaby boýunça, 1990-njy ýylda dünýäde eneleriň ölüm hadysalarynyň 26%-i Hindistanyň paýyna düşýärdi, 2020-nji ýyla çenli bu görkeziji 8%-e çenli azaldy.
Häzirki wagtda Hindistanyň ilatynyň 26%-ini 10-24 ýaş aralygyndaky ýaşlar emele getirýär, şol bir wagtyň özünde 2023-nji ýylda doglan erkekler üçin garaşylýan ömür dowamlylygy 71 ýyl, aýallar üçin 74 ýyl diýlip hasaplanýar.
2011-nji ýylda geçirilen soňky ilat ýazuwynyň maglumatlaryna görä, Hindistanyň ýaşaýjylarynyň sany 1,21 mlrd adama barabardy.
BMG-niň hasaplamalary boýunça, Hytaýyň ilaty 2022-nji ýylda iň ýokary – 1,426 mlrd adam derejesine ýetdi we azalyp başlady. Hindistanyň ýaşaýjylarynyň sany 2023-nji ýylyň aprel aýynyň ahyryna çenli ilat sany boýunça Hytaýyň materik bölegi bilen deňleşdi. Bilermenler şu asyryň ahyryna çenli Hytaýyň ilat sanynyň 1 mlrd adamdan azalyp biljekdigini çaklaýarlar. Hindistanyň ilatynyň bolsa, tersine, geljek birnäçe onýyllyklarda artmagyna garaşylýar.
