Parižde geçiriljek tomusky Olimpiýa oýunlarynyň öňüsyrasynda Oýunlara gatnaşýan bäş yklymy alamatlandyrýan biri-biriniň içinden geçen bäş Olimpiýa halkasy Eýfel diňinde gurnalar. Bu barada “Le Parisien” gazetine salgylanyp, championat.com habar berýär.
“Her Olimpiadada bäş sany uly halka Oýunlary kabul edýän şäher üçin simwoliki bolan ýerde gurnalýar” diýlip, makalada bellenilýär.
Gazetiň maglumatlaryna görä, halkalar, takmynan, 60 metr beýiklikde, diňiň birinji we ikinji gatlarynyň aralygynda ýerleşdiriler. Mundan başga-da, Eýfel diňi sport ýaryşlarynda-da möhüm roly ýerine ýetirer. Şeýlelikde, kenarýaka woleýboly boýunça ýaryş onuň etegindäki Mars meýdançasynda geçiriler. Onuň golaýynda, Trokadero meýdançasynda “Çempionlar seýilgähi” diýlip atlandyrylýan uly fan-zolak dörediler, bu ýerde her gün medal eýeleri köpçüligiň öňüne çykarlar.
Ýatlap geçsek, tomusky Olimpiýa oýunlary 26-njy iýuldan 11-nji awgust aralygynda, Paralimpiýa oýunlary 28-nji awgustdan 8-nji sentýabr aralygynda Fransiýada geçiriler.
