Goal portaly 2024-nji ýylda “Altyn topy” almaga dalaşgärleriň täzelenen reýtingini hödürledi.
Bu baýrak üçin esasy dalaşgär hökmünde Madridiň “Realynyň” futbolçysy Jud Bellingem saýlandy. Şu möwsümde oýunçy Ispaniýanyň çempionatynda 23 oýna gatnaşyp, 16 gol we dört netijeli geçirim bilen tapawutlandy. Onuň topary La Ligada lider bolmak bilen, ýakyn bäsdeşinden sekiz utuk öňde barýar.
Reýtingiň ikinji ornunda “PSŽ-niň” oýunçysy Kilian Mbappe ýerleşdi. Hüjümçi Fransiýanyň çempionatynyň 25 oýnunda 24 gol geçirip, alty netijeli geçirim etdi. “PSŽ” Liga 1-iň lideridir.
Esasy dalaşgärleriň üçlügini “Mançester Sitiden” Filip Foden jemledi. Ýarym goragçy Angliýanyň çempionatynda 30 oýna gatnaşyp, öz hasabyna 14 gol we ýedi netijeli geçirim ýazdy. Ol Erling Holanddan soň toparyň ikinji iň köp gol geçiren oýunçysydyr.
Şeýle-de, dalaşgärleriň bäşligine “Mançester Sitiniň” ýene iki oýunçysy – Erling Holand we Rodri girdi.
