3-nji aprelde Ýewropa Bileleşigi welosiped pudagyny ösdürmäge gönükdirilen welotransport barada Jarnama kabul etdi. Şeýle çözgüt ÝB-niň awtomobilleriň sanyny azaltmak we ekologiýa taýdan arassa ulag serişdelerini ösdürmek ýolunda nobatdaky ädim boldy. Bu barada ÝB-niň resmi saýtynda habar berilýär.
Jarnama welosipedi hereket etmegiň ÝB-niň ykdysadyýeti üçin möhüm ähmiýete eýe bolan ekologiýa taýdan arassa, elýeterli we arzan serişdesi hökmünde ykrar edýär.
“Biz welosipediň köp sanly peýdalarynyň bardygyny ykrar edýäris: ol daşky gurşawyň hapalanmagyny, şäher dyknyşyklaryny azaldýar we has sagdyn durmuş ýörelgesine ýardam edýär. Mundan başga-da, welosiped Ýewropa senagatynyň möhüm özenidir” – diýip, ulag meseleleri boýunça ýewrokomissar Adina Welýan belledi.
Jarnamada welosiped transportynyň ösdürilmeginiň ÝB-e daşky gurşawy goramakda öňde goýlan maksatlara ýetmäge kömek etjekdigi bellenilýär. Belläp geçsek, ÝB ýurtlary 2030-njy ýyla çenli bug gazlarynyň arassa zyňyndylaryny azyndan 55% azaltmaga borçlandylar, 2050-nji ýyla çenli bolsa klimat bitaraplygyny gazanmaga çalyşýarlar.
Jarnamada welosipediň sosial inklýuziwligi gowulandyrýandygy hem-de adamlaryň fiziki we akyl saglygyna ýardam edýändigi bellenilýär. Hut aramlyk fiziki işjeňlik saglyk töwekgelçiliklerini we az hereketli durmuş ýörelgesi bilen baglanyşykly irki ölümi azaldýar.
Şeýle-de, welosiped bilen beýleki ulag serişdeleriniň arasynda özara gatnaşygy artdyrmak meýilleşdirilýär, mysal üçin, awtobuslarda we otlularda has köp welosipedleri daşamaga mümkinçilik bermek, şeýle-de stansiýalarda we ulag merkezlerinde welosipedler üçin howpsuz duralga zolaklaryny üpjün etmek göz öňünde tutulýar.
