4-nji aprelde Bakuda hazarýaka döwletleriniň Baş prokuraturalarynyň wekilleriniň bäştaraplaýyn duşuşygy geçirildi. Duşuşyk "Hazar deňziniň akwatoriýasynda ekologiýa wehimleri we hukuk bozulmalar: deňiz gurşawyny goramakda prokuratura edaralarynyň strategiýasy" mowzugyna bagyşlandy diýip, "Azertag" agentligi habar berýär.
Türkmenistandan duşuşykda baş prokuroryň orunbasary Rahym Ataýew we Türkmenistanyň Azerbaýjandaky ilçisi Gurbanmämmet Elýasow wekilçilik etdi.
Bäştaraplaýyn duşuşygyň barşynda çykyş eden Azerbaýjanyň ekologiýa we tebigy serişdeler ministriniň orunbasary Umaýra Tagiýewa şu ýylda Bakuda geçiriljek Howanyň üýtgemegi boýunça BMG-niň Çarçuwalaýyn konwensiýasynyň 29-njy maslahatynda (COP 29) azerbaýjan tarapynyň Hazar başlangyjyny öňe sürmek isleýändigini habar berdi. Onuň aýtmagyna görä, bu başlangyç diňe bir umumymilli we sebit derejesinde däl, eýsem, howanyň üýtgemegine ählumumy uýgunlaşmak maksatnamalarynyň çäklerinde hem deňiz meselelerini çözmäge ýardam eder.
Çäreleriň çäklerinde Rahym Ataýew Azerbaýjanyň baş prokurory Kamran Aliýew bilen gepleşikleri geçirdi.
