Microsoft korporasiýasyny esaslandyryjy Bill Geýts emeli aň häzir adam üçin kyn bolan zatlary etmäge ukyply bolsa-da, geljekde aňsat ýumuşlary ýerine ýetirmekde şowsuzlyga uçrar diýip hasaplaýar. Bu barada ol Hindistanyň premýer-ministri Narendra Modi bilen gürrüňdeşlikde aýtdy diýip, TASS habar berýär.
Geýtsiň aýtmagyna görä, häzirki wagtda dünýä emeli aň tehnologiýalarynyň ösüşiniň başlangyç tapgyryna syn salýar. “Bu emeli aňyň ösüşiniň ilkinji günleri. Ol siziň kyn hasaplaýan zadyňyzy bitirer, soňra ýeňil hasaplaýan zadyňyzda şowsuzlyga uçrar” – diýip, ol belledi.
Geýts bu tehnologiýanyň artykmaçlyklary hödürlese-de, emeli aňyň ulanylmagynyň käbir meseleler bilen baglanyşykly bolup biljekdigini aýdýar.
Şeýle-de, Geýts Hindistanyň premýer-ministri bilen duşuşykda Günorta Aziýa respublikasynyň sanly ösüşine ýokary baha berdi. Ol Hindistanyň diňe bir tehnologiýalary uýgunlaşdyrman, eýsem bu ugurda öňde barýandygyny belledi.
