Apple öňki işgäri Endrýu Oude garşy şikaýat arzasyny berdi. Ol gizlinlik baradaky şertnamany bozup, žurnalistlere kompaniýanyň çykmadyk önümleri barada maglumatlary bermekde aýyplanýar. Bu barada MacRumors portaly habar berýär.
Arza görä, Oude 2020-nji ýylda “The Wall Street Journal” neşiriniň žurnalistlerine Vision Pro garniturasy, 2023-nji ýylda bolsa “Gündelik” programmasy barada maglumat berdi.
Umuman alanyňda, ol žurnalistlere 11 müňden gowrak habar iberdi. “The Information-yň” žurnalisti bilen duşuşmak üçin bolsa onuň “tutuş yklymdan geçendigi” bellenilýär.
Oude Apple-den kompaniýanyň howpsuzlyk gullugy maglumat syzmasyny anyklandan soň, 2023-nji ýylyň dekabr aýynda çykaryldy. Kompaniýanyň meseläni kazyýetsiz çözmek synanyşyklary şowsuz boldy.
Bellenilişi ýaly, Oude kompaniýa tarapyndan kolleji gutarandan soň 2016-njy ýylda işe alyndy. Onuň borçlaryna akkumulýatorlaryň işini optimizasiýalaşdyrmak girýärdi, bu hem oňa kompaniýanyň onlarça möhüm taslamalary baradaky maglumatlara elýeterlilik berdi.
Apple şikaýat arzasynda Oudeden öwezini dolmagy talap edýär. Çeşmeler onuň maglumat syzmasynda günäsini boýun alandygyny, ýöne kompaniýa bilen hyzmatdaşlykdan ýüz öwrendigini belleýärler.
Öwezini dolmagyň ahyrky mukdary kazyýet işiniň dowamynda kesgitlener.
