Windows 11-de 1995-nji ýyldan bäri täzelenmedik bir funksiýa ýüze çykaryldy. Gürrüň 30 ýyl mundan ozal Windows 95-den Windows NT-e kod geçirmek üçin işläp düzüji Deýw Plammer tarapyndan döredilen “Formatirlemek” guraly barada gidýär.
“Biz Windows 95 ulanyjy interfeýsinden NT-e millionlarça setir kod geçirdik we formatirlemek Windows NT-niň Windows 95-den düýpgöter tapawutlanýan ýerleriniň biri bolandygy üçin, biz hususy ulanyjy interfeýsini oýlap tapmaly bolduk. Men kagyz çykaryp, faýl sistemasy, bellik, klasteriň ölçegi, gysyş, şifrlemek we ş.m. ýaly diski formatirlemegiň mümkin bolan ähli wariantlaryny ýazdym” – diýip, Plammer “The Verge” neşirine gürrüň berdi.
Plammer diskleri formatirlemegiň ýönekeý interfeýsini döretdi we ony doly işlemegi-de meýilleşdirmedi. Işläp düzüji FAT faýl ulgamynda tomuň ölçegi üçin 32 Gbaýt çäk goýdy.
Hünärmeniň aýtmagyna görä, bu çözgüt wagtlaýyndy, ýöne ol sistemanyň aýrylmaz bölegine öwrüldi.
Şondan bäri “Formatirlemek” penjiresiniň dizaýny we funksionaly üýtgedilmedi we ol Windows 11-de hem Windows NT-däki ýaly görünýär.
Muňa garamazdan, üçünji tarap gurallaryň kömegi bilen FAT çäklendirmesinden geçmek we 2 Tbaýta çenli möçberde tom döretmek bolýar.
