2024-nji ýylyň Nýu-Ýork awtosalonynda World Car Awards (“Ýylyň bütindünýä awtomobili”) baýragynyň gowşurylyş dabarasy geçirildi. Ýeňijileriň sanawynda elektromobiller agdyklyk etdi diýip, tarantas.news habar berýär.
Şeýlelikde, ýokary baýraga hem “Dünýä elektromobili”, hem “Ýylyň bütindünýä awtomobili” adyna eýe bolan Kia EV9 mynasyp boldy. Ol bu ýeňiş ugrunda BYD Seal (Atto 4) we Volvo EX30 bilen bäsleşdi. Bu Kia kompaniýasy üçin uly ýeňiş bolup, üç hatarly elektrik krossoweriniň abraýyny ýokarlandyrmaga kömek eder.
Kia-nyň prezidenti we baş müdiri Ho Son Son bu baýragyň kompaniýanyň tehnologiýalaryň we dizaýn kämilliginiň çäklerini giňeltmäge ygrarlylygynyň subutnamasydygyny belledi.
Hyundai Motor Group-yň ýeňşi diňe şunuň bilen tamamlanmady. “Ýylyň sport awtomobili” nominasiýasynda Ioniq 5 N ýeňiji boldy. Bu ýerde birinji orun üçin BMW M2 we XM hem göreşdi.
“Ýylyň şäher awtomobili” nominasiýasynda BYD Dolphin we Lexus LBX awtomobillerinden öňe geçen Volvo EX30 ýeňiş gazandy. Öz gezeginde, BMW i5/5-Series awtomobili Mercedes E-Class-dan we EQE krossowerinden öňe geçip, “Ýylyň premial awtomobili” nominasiýasynda ýeňiji boldy.
Ahyrynda, Toyota Prius “Ýylyň dizaýny” baýragyna eýe boldy. Ol bu göreşde Ford Bronco we Ferrari Purosangue awtomobillerinden üstün çykdy. Baýrak awtomobiliň öňki görnüşlerine garanyňda has görnükli görünýän batyrgaý täze keşbiniň subutnamasydyr.
