28-nji martda Hytaýda Xiaomi-niň ilkinji elektromobili SU7-niň satuwy başlaýar. Kompaniýa bu wakanyň öňüsyrasynda eýýäm App Store-da (Hytaý sebiti) elýeterli bolan resmi Xiaomi Auto goşundysyny hödürledi diýip, Mail.ru habar berýär.
Xiaomi Auto goşundysy şulara mümkinçilik berýär:
Öz awtomobil konfigurasiýaňy ýygnamaga we diler bilen satyn alyş barada ylalaşmaga;
SU7-niň synag sürüşlerine ýazylmaga;
Tehniki goldawa we gyzgyn telefon liniýasyna elýeterli bolmaga;
Beýleki SU7 eýeleri bilen aragatnaşyk saklamaga, tejribeler we maslahatlar bilen paýlaşmaga;
Awtomobiliň ýerleşýän ýerini görmäge, uzak aralykdan hereketlendirijini işletmäge we peji ýakmaga;
Awtomobiliň ýagdaýy we tehniki hyzmat etmegiň zerurlygy barada duýduryş habaryny almaga.
Xiaomi Auto-ny ulanmak üçin iOS 13-li ýa-da has soňky wersiýaly iPhone gerek bolar. Android wersiýa heniz elýeterli däl, ýöne onuň ýakyn wagtda peýda bolmagyna garaşylýar.
SU7-niň bahasy hem entek aýan edilmedi, ýöne kompaniýanyň ýolbaşçysy Leý Szýun onuň 500 müň ýuandan (takmynan, 69 müň ABŞ dollary) pes boljakdygyna ynandyrýar.
