Cognition amerikan kompaniýasy inžener-programmistiň ähli işini özbaşdak ýerine ýetirmäge ukyply Devin neýroulgamyny hödürledi. Emeli aň diňe bir programmistlere kod ýazmaga kömek etmän, eýsem taslamalary özbaşdak meýilleşdirmäge we durmuşa geçirmäge, ýalňyşlyklary öwrenmäge we düzetmäge ukyplydyr. Bu barada MSPoweruser portaly habar berýär.
Devin täze tehnologiýalara çalt uýgunlaşyp, resminamalary okamak bilen täze gurallary çalt özleşdirip bilýär. Neýroulgam doly işleýän web-programmalary hem döredip, ulanyjylardan gelýän seslenmelere görä täze funksiýalary goşýar. Şeýle-de, Devin koddaky näsazlyklary özbaşdak ýüze çykaryp, düzedýär we sazlaýar, hatda uly dil modellerini-de gurnaýar hem sazlaýar.
Bloomberg-iň žurnalistleri taslamany synap gördüler we netijeden kanagatlanandyklaryny aýtdylar. Neýroulgam olar üçin ýönekeý tekst beýany boýunça Sidneýiň restoranlary bilen doly derejeli katalog saýtyny döretdi.
Devin-iň ornaşdyrylmagy gündelik işleri öz üstüne alyp, programmistleriň ýüküni ýeňilleşdirip biler, şeýle-de bolsa has kyn we döredijilikli çemeleşmäni talap edýän ýumuşlaryň ýerine ýetirilişine gözegçilik etmek üçin adamyň gatnaşmagy barybir zerur bolar diýip, žurnalistler belleýär.
