Santa-Monikada 49-njy People’s Choice Awards dabarasy geçirildi. Bu ýerde ýeňijiler tomaşaçylaryň ses bermegi bilen kesgitlenýär. Agşamyň esasy baýrak eýesi Greta Gerwigiň “Barbi” filmi boldy. Ol “Ýylyň filmi” we “Ýylyň komediýa filmi” hökmünde baýraklary aldy. Bu barada people.com saýty habar berýär.
Baş keşpleri ýerine ýetiriji Margo Robbi we Raýan Gosling “Ýylyň kino ýyldyzlary” diýlip yglan edildi, ikinji plandaky keşbi ýerine ýetiren Amerika Ferrera “Ýylyň iň gowy aktrisasy” adyny aldy.
Belläp geçsek, “Barbi” “Altyn globus” we BAFTA baýraklaryny alyp bilmedi, şonuň üçin onuň People’s Choice Awards-daky ýeňşi teselli beriji baýrak hökmünde hyzmat edýär diýseňem bolar.
Dabaranyň ýene bir möhüm wakasy meşhur komik we kinoaktýor Adam Sendleriň “Ikona” baýragyny almagy boldy. Bu baýragy oňa ýakyn dosty we kärdeşi Jennifer Eniston gowşurdy. Onuň özi-de “Irdenki şoudaky” keşbi üçin “Ýylyň tele-ýyldyzy (drama)” kategoriýasynda heýkel aldy. Pedro Paskal “Erkekleriň arasynda ýylyň tele-ýyldyzy” boldy.
BTS-den Jonguk “Ýylyň artisti” diýlip yglan edildi. “Ýylyň zenan artisti” we “Ýylyň pop artisti” bolsa Teýlor Swift boldy.
Şakira “Iň gowy latyn amerikaly artist” hökmünde baýraga mynasyp boldy. “Ýylyň aýdymy” diýlip Oliwiýa Rodrigonyň “Vampire” aýdymy saýlandy.
