Londonda geçirilen BAFTA kinoakademiýasynyň 77-nji baýrak gowşurylyş dabarasynda Kristofer Nolanyň “Oppengeýmer” filmi has köp baýraga eýe boldy. Ýeňijileriň sanawy akademiýanyň saýtynda hödürlendi diýip, REN TV habar berýär.
Şeýlelikde, atom bombasyny dörediji baradaky film 2023-nji ýylyň iň gowy filmi boldy, Nolan bolsa iň gowy režissýor diýlip ykrar edildi. Baş keşbi ýerine ýetiriji Kilian Mýorfi iň gowy aktýor hökmünde saýlandy, kiçi Robert Dauni bolsa “Ikinji plandaky iň gowy erkek keşbi” nominasiýasynda baýraga eýe boldy. Şeýle-de, “Oppengeýmer” “Film üçin iň gowy aýdym-saz”, “Iň gowy montaž” we “Iň gowy operatorlyk işi” nominasiýalarynda ýeňiş gazandy.
Iň gowy aktrisa hökmünde Ýorgos Lantimosyň “Garyplar-betbagtlar” filmindäki Bella Baksteriň keşbi üçin Emma Stoun saýlandy. Filmiň özi hudožnik-režissýoryň işi, wizual effektler, grim we saç bezegi, şeýle-de egin-eşik dizaýny üçin baýraklara eýe boldy.
Soňra baýragyň sany boýunça “Iň gowy britan filmi”, “Iň gowy iňlis dilli däl film” we “Iň gowy ses” nominasiýalarynda ýeňiş gazanan Jonatan Gleýzeriň “Gyzyklanma zolagy” gelýär.
Haýao Miýadzakiniň “Oglan we guş” kartinasy iň gowy animasion film diýlip ykrar edildi.
Şeýle-de, “Iň gowy original ssenariýa” – Žýustin Trieniň “Ýykylmagyň anatomiýasy”, “Iň gowy adaptirlenen ssenariýa” – Kord Jeffersonyň “Amerikan harsal eseri”, “Iň gowy kasting” – Aleksandr Peýniň “Galdyrylanlar” kartinasy, “Iň gowy dokumental film” – “20 gün Mariupolda” filmi boldy.
