«Xiaomi 14 Ultra» flagman kamerafonynyň gyralarynda egri ekran bolmaz. Muny «WinFuture» portaly tarapyndan neşir edilen enjamyň render suratlary tassyklaýar.
«Xiaomi 14 Ultra» ozal garaşylşy ýaly, titan çarçuwa bilen üpjün edilmez – onuň ýerine korpus alýumin gurluşa eýe bolar. Şeýle hem täze kamerafonyň diagonaly 6,73 dýuým, durulygy 3200x1440 piksel, täzelenme tizligi 120 Gers we iň ýokary ýagtylygy 3000 nit bolan tekiz AMOLED ekrany bilen üpjün ediljekdigi mälim boldy.
Yzky paneldäki kamerada dört sany 50 megapikselli modul bolar. Olaryň esasysynda bir dýuým datçik we üýtgeýän diafragma ýerleşdiriler. Iki goşmaça kamera 3,2 we 5 esse optiki ýakynlaşdyrma mümkinçiligini hödürlär, dördünjisi bolsa f/1,8 diafragmaly ultra giň burçly obýektiwe eýe bolar.
Beýleki aýratynlyklara ekranda barmak yzy skaneriniň bolmagy, Wi-Fi 7 we Bluetooth 5.4, şeýle hem aragatnaşyksyz töleg üçin NFC çipi girýär. Mundan başga-da, enjam IP68 standartyna laýyklykda, suwdan we tozandan goralar.
