«Apple» kompaniýasynyň hünärmenleri ulanyjynyň bölüp çykarýan derini seljermäge mümkinçilik berýän akylly sagatlar üçin datçik oýlap tapdylar. Bu barada lenta.ru «PatentlyApple» neşirine salgylanyp habar berýär.
Patent ABŞ-nyň Patentler we haryt nyşanlary boýunça edarasynyň (USPTO) maglumatlar bazasynda çap edildi. Materialda der datçiginiň fiziologiki bölünip çykýan suwuklygy seljermäge we maglumatlara esaslanyp, saglygyň hem-de beden işjeňliginiň dürli görkezijilerini kesgitlemäge mümkinçilik berjekdigi aýdylýar.
Datçik iki elektroddan we mikroprosessordan ybaratdyr. Sensor sagadyň arka tarapynda ýerleşýär, ulanyjynyň derisine tarap gönükdirilendir. Şeýlelikde, «Apple Watch» goşmaça görkeziji esasynda adam bedenini seljermegi öwrener.
Alymlaryň bellemeklerine görä, derlemek adamyň saglygy barada köp maglumatlary berip bilýär. Mysal üçin, ýörite datçik türgenleşik wagtynda ulanyjynyň bedeniniň näçe çyglylyk ýitirýändigini anyklamaga we fiziki işjeňligi sazlamaga kömek eder. Hünärmenleriň pikiriçe, derňew prosesi bäş sekuntdan köp wagt almaýar.
