Fransuz režissýory Lýuk Besson meşhur «Drakula» romany esasynda film surata düşürer. Bu barada lenta.ru «Deadline» neşirine salgylanyp habar berýär.
Graf Drakulanyň galasyna düşýän hukukçy Jonatan Harkeriň keşbini 34 ýaşly Kaleb Lendri Jons ýerine ýetirer. Ikinji esasy keşbi Kristof Wals janlandyrar, ýöne munuň meşhur wampiriň keşbi bolup-bolmajakdygy heniz belli däl. Çeşmeler Bessonyň romany Drakulanyň söýgi hekaýasyna gönükdirip, filme uýgunlaşdyrjakdygyny aýdýarlar. Filmiň surata düşürilişiniň 2024-nji ýylda başlamagyna garaşylýar.
Irlandiýaly ýazyjy Brem Stokeriň «Drakula» romany 1897-nji ýylda neşir edildi we okyjylaryň arasynda uly üstünlik gazandy. Kitap «wampir mifiniň» meşhurlygyny artdyrmakda örän täsirli bolupdyr. Netijede, Drakula ýa-da onuň keşbinden ylham alnyp döredilen wampir gahrymanlary barada elli töweregi film surata düşürildi.
