Kinorežissýor Kristofer Nolan özüni täze žanrda - horrorda synap görmek islegini paýlaşdy. ComingSoon-yň habaryna görä, ol muny 14-nji fewralda Britaniýanyň film instituty (BFI) tarapyndan gurnalan kino pudagynyň şahsyýetleri üçin her ýyl geçirilýän çärede aýtdy.
Nolan: "Men höwes bilen gorkunç film düşürerdim. Dogry, munuň üçin, hakykatdanam, öňdebaryjy pikirler gerek. Olar bolsa gaty az. Entek muňa laýyk boljak waka tapdyraýanok. Gorkunç filmler – bu kinematografyň gözi bilen seredeňde diýseň gyzykly žanr" - diýdi.
Şeýle hem režissýor özüniň soňky "Oppengeýmer" filminde horroryň usullarynyň bardygyny aýtdy.
"Meniň pikirimçe, bu elementler filmiň sýužetine doly laýyk gelýär" – diýip, ol sözüniň üstüne goşdy.
Kristofer Nolan döwrümiziň iň meşhur we üstünlikli režissýorlaryndan biridir. Onuň “Başlangyç”, “Garaňky rysar”, “Interstellar”, “Dýunkerk” we “Oppengeýmer” ýaly filmleri tankytçylaryň we tomaşaçylaryň ýokary bahasyna mynasyp boldy.
