Amerikanyň Nvidia tehnologiýa korporasiýasy ABŞ-da bazar bahasynyň möçberi boýunça iň uly kompaniýalaryň arasynda üçünji orna çykyp, bu orundan Alphabet-i süýşürdi. Bir gün öň bolsa Nvidia dördünji orundan Amazon kompaniýasyny gysyp çykaryp, ýigrimi ýylda ilkinji gezek ondan öňe geçdi. Bu barada Reuters agentligine salgylanyp, kommersant.ru habar berýär.
Çarşenbe güni geçirilen söwdada Nvidia-nyň paýnamalary 2,46% ýokarlandy. Netijede, kompaniýanyň bazar bahasy 1,825 trln dollara ýetdi. Alphabet-iň bazar bahasy 1,821 trln dollara barabar boldy. Geçirilen söwdanyň jemi boýunça Amazon-yň kapitalizasiýasy 1,776 trln dollara ýetdi. Nvidia emeli aň tehnologiýalary üçin ýokary öndürijilikli çipleriň bazarynyň, takmynan, 80%-ine gözegçilik edýär. Emeli aňyň ösýän döwründe ýarym geçirijilere bolan islegiň artmagy sebäpli geçen ýyl Nvidia-nyň paýnamalary üç esse gymmatlady, şu ýylyň başyndan bäri bolsa ýene 50% ýokarlandy.
ABŞ-da we dünýäde birinji hem ikinji orunlary Microsoft ($3 trln) we Apple ($2,8 trln) saklaýar. Dünýäde bazar bahasy boýunça üçünji orny $2 trln bilen Saud Arabystanynyň Saudi Aramco döwlet kompaniýasy eýeleýär.
