Ýewropanyň Airbus aerokosmos korporasiýasy 2023-nji ýylyň dördünji çärýegi we tutuş ýyl üçin maliýe hasabatyny hödürledi. Dördünji çärýekde korporasiýanyň girdejisi 11% ýokarlanyp, 22,9 mlrd ýewro barabar boldy. Arassa girdeji 13%, 1,5 mlrd ýewro çenli azaldy. 2023-nji ýylda hem konserniň girdejisi 11% ýokarlanyp, 65,5 mlrd ýewro boldy. Arassa girdeji 11% azalyp, 3,8 mlrd ýewro barabar boldy diýip, kommersant.ru habar berýär.
Düşewündiň azalmagy kosmos enjamlaryny öndüriji bölümçe bilen baglanyşykly hasapdan aýrylmalar sebäpli boldy. Şol bir wagtyň özünde, 2023-nji ýylda esasy işden alnan operasion girdeji 4%, 5,8 mlrd ýewro çenli artdy. Airbus şu ýyl onuň 6,5 – 7 mlrd ýewro ýetmegine garaşýar. Girdejiniň we operasion girdejiniň ýokarlanmagy sargyt edilen we gowşurylan uçarlaryň ep-esli artmagy bilen baglanyşyklydyr. Bir ýylda Airbus tas 2094 uçar üçin sargyt aldy – 2022-nji ýyl bilen deňeşdirilende 155% ösüş. Kompaniýa sargyt edijilere 735 uçar iberdi – bir ýyl ozalkydan 11% köp.
Şeýlelikde, Airbus uçar üpjünçiligi boýunça yzygider bäşinji gezek esasy bäsdeşi Boeing-den öňe geçdi. Boeing 2023-nji ýylda 528 uçar iberdi we 1576 uçar üçin sargyt aldy. Kompaniýa ýyly 2,2 mlrd dollar arassa ýitgi bilen tamamlady.
