15-nji fewralda we 16-njy fewrala geçilen gije UEFA-nyň Ýewropa ligasynyň ilkinji geçiş oýunlary geçirildi. Toparlar 1/8 finala çykmak ugrunda göreşdiler. Bu tapgyrda Ýewropa ligasynyň toparlaýyn tapgyrynda ikinji orunlaryň sekiz eýesi Çempionlar ligasynyň toparlaýyn tapgyrynda üçünji orunlaryň sekiz eýesine garşy oýnaýarlar.
Esasy wakalar:
- “Şahtýor” (Ukraina) – “Olimpik Marsel” (Fransiýa) 2:2: Hasaplar oýnuň ikinji ýarymynda açyldy. “Olimpigiň” hüjümçisi Pýer-Emerik Obameýang Ýewropa ligasynda 30-njy goluny girizip, ýaryşyň taryhynda iň köp gol girizen oýunçy hökmünde Radamel Falkao bilen deňleşdi.
- “Braga” (Portugaliýa) – “Karabah” (Azerbaýjan) 2:4: Zubiriň iki goly we Ýankowiç hem Žuninýonyň gollary “Karabaha” uly ýeňiş getirdi.
- “Feýenoord” (Niderlandlar) – “Roma” (Italiýa) 1:1: Lukaku arakesmeden soň hasaby deňledi, ýöne “Feýenoord” goşmaça wagtda ýeňiş gazanyp bilerdi (rimlileri ştanga halas etdi).
- “Galatasaraý” (Türkiýe) – “Sparta” (Çehiýa) 3:2: Ikardi goşmaça wagtda ýeňiş goluny geçirdi. Toparlaryň ikisi-de oýnuň ikinji ýarymynda on bolup oýnadylar.
- “Milan” (Italiýa) – “Renn” (Fransiýa) 3:0: Loftus-Çikiň iki goly we Leauwyň goly “Milana” ýeňiş getirdi.
- “Ýang Boýz” (Şweýsariýa) – “Sporting” (Portugaliýa) 1:3: “Sporting” arakesmeden soň üç jogapsyz goly geçirdi.
- “Benfika” (Portugaliýa) – “Tuluza” (Fransiýa) 2:1: Di Mariýa iki penaltini ýerine ýetirdi, “Benfika” Ýewropa ligasynda öz meýdançasynda utulman gelýär – 21 ýeňiş we bäş deňme-deňlik.
- “Lans” (Fransiýa) – “Fraýburg” (Germaniýa) 0:0: “Lans” ýewrokuboklaryň 37 öý oýnunda ilkinji gezek gol geçirip bilmedi.
Jogap oýunlary 22-nji fewralda geçiriler.
Ýatlap geçsek, çykyş goly düzgüni ýatyryldy. Geçiş oýunlaryň ýeňijileri 1/8 finalda Ýewropa ligasynyň toparlarynyň ýeňijilerine goşular. Bu tapgyryň bije çekişigi 23-nji fewralda geçiriler. Utulanlar ýewrokuboklardan çykýar.
1/8 finalda birinji sebetde ýerleşdirilen toparlar:
- “Atalanta” (Italiýa)
- “Baýer” (Germaniýa)
- “Braýton” (Angliýa)
- “West Hem” (Angliýa)
- “Wilýareal” (Ispaniýa);
- “Liwerpul” (Angliýa);
- “Reýnjers” (Şotlandiýa);
- “Slawiýa” Praga (Çehiýa).
