Samsung Electronics we Google tehnologiýa ägirtleri bir wagtda diýen ýaly nauşniklere emeli aň funksiýasyny goşup, olaryň ulanylyşynda rewolýusiýany geçirmek kararyna geldiler.
Şeýlelikde, Samsung öz nauşnikleri üçin internete birikmezden hakyky wagtda göni gepleşigi sinhron terjime etmäge mümkinçilik berýän Live Translate funksiýasy bilen täzelenme hödürledi diýip, 91mobiles.com portaly habar berýär.
Funksiýa Galaxy Buds 2 Pro, Galaxy Buds 2 we Galaxy Buds FE nauşniklerinde Galaxy S24 smartfonlarynyň eýelerine elýeterli bolar. Ony ulanmak üçin Galaxy Buds programmasyny täzelemeli bolar. Funksiýanyň işe giriziljek senesi heniz belli däl.
Başlangyç tapgyrda terjimeçi diňe iňlis, ispan, fransuz, italýan, hytaý, ýapon we koreý dillerini goldaýar.
Şol bir wagtyň özünde Google hem nauşniklere öz täze Gemini çat-botyny birikdirmäge taýýarlanýar. Bu emeli aň modeli Google Assistant bilen deňeşdirilende has ösen funksiýalara eýedir diýip, 9to5google belleýär.
Bellenilişi ýaly, geljekde emeli aňly nauşnikler diňe bir terjimeçi hökmünde adamlara dürli dillerde gatnaşmaga kömek etmän, eýsem akylly söhbetdeş bolup, ulanyjylara işleri meýilnamalaşdyrmak, söwda etmek we maglumat gözlemek ýaly dürli işlerde kömek eder.
