Google 2019-njy ýylda ýapylan Google+ sosial ulgamynyň ulanyjylaryna 350 million dollar öweztöleg tölemäge razy boldy. Kompaniýa müşderileriniň şahsy maglumatlaryny goramandygyny we syzmak ähtimallygynyň bardygy barada olara habar bermändigini boýun aldy diýip, The Record ýazdy.
Google+ 2011-nji ýylda Facebook-a bäsdeş hökmünde döredildi, ýöne meşhurlyk gazanyp bilmedi. 2019-njy ýylda Google taslamany ýapmak kararyna geldi. Şeýle-de bolsa, şondan öň Google+-yň ulanyjylarynyň suraty, e-poçtasy, ady, jynsy, doglan senesi, ýaşaýan ýeri, hünäri we maşgala ýagdaýy ýaly, duýgur maglumatlary internetde peýda boldy. Google bu barada ulanyjylaryna duýdurmandyr ýa-da gorag çärelerini teklip etmändir.
2018-nji ýylda The Wall Street Journal Google-y maglumatlaryň syzdyrylandygyny ýaşyrmakda aýyplaýan derňewi çap etdi. Şondan soň, Google+-yň ulanyjylary ýetirilen zyýanyň öwezini dolmagy talap edip, kompaniýa garşy kazyýet işini açdyrdy. Google "özüni goramak üçin ýerlikli delilleriň" bardygyny aýdyp, kazyýet işine garşy göreşmäge synanyşdy. Şeýle-de bolsa, kompaniýa kazyýet işi üçin wagt we serişde ýitirmezlik kararyna geldi we ylalaşyk şertnamasyna razy boldy.
